Spánverjar eru ekki þekktir sem pastaþjóð eins og Ítalír en það er rótgróin pastahefð þar eins og víðar í Evrópu. Spænska bragðið í þessari fljótlegu uppskrift kemur með chorizo-pylsunni (sem má fá heila í mörgum stórmörkuðum) og reykta paprikukryddinu, sem er mikið notað í spænskri matargerð og víðast hvar hægt að fá hér í búðum.
- 500 g Tagliatelle
- 1 chorizo-pylsa
- 1 laukur, saxaður
- 4-5 hvítlauksgeirar
- 10-12 sveppir
- 1 msk reykt paprika (smoked paprika)
- 1 lúka flatlaufa steinselja, fínsöxuð
- 1 dós tómatar
- ólífuolía
- salt og pipar
Saxið lauk, hvítlauk og sveppi. Hitið olíu á pönnu eða þykkum potti og steikið í 3-4 mínútur. Skerið pylsuna í bita og steikið með í 2-3 mínútur í viðbót. Hellið þá tómötunum út á, setjið paprikukryddið út í, blandið vel saman og leyfið að malla í tuttugu mínútur til hálftíma á miðlungshita. Eftir því sem þið leyfið henni að malla lengur verður hún betri.
Blandið saxaðri steinseljunni saman við í lokin. Bragðið til með salti og pipar. Blandið saman við pasta og berið fram með nýrifnum parmesan.
