Það vekur alltaf töluverða athygli þegar bandaríska tímaritið Wine Spectator birtir lista sinn yfir 100 bestu vín ársins. Hann hefur nú litið dagsins ljós og vínið sem trónar á toppnum er frá framleiðanda sem Íslendingum er að góðu kunnur eða Columbia Crest í Washington-ríki í Bandaríkjunum.
Nánar tiltekið er það Cabernet Sauvignon Columbia Valley Reserve 2005 sem er vín ársins 2009.
Í öðru sæti kemur svo hið spænska Numanthia-Termes Toro Termes 2005 og í þriðja sæti er svo Domaine de Vieux Télegraph 2007 frá Chateauneuf-de-Pape.
Það hefur verið nokkuð misjafnt milli ára hversu dýr vín hafa toppað hjá Wine Spectator og vekur athygli að tvö efstu vínin í ár kosta bæði undir 30 dollurum.
Á listanum eru svo ýmis vín sem hafa verið eða eru fáanleg á Íslandi. Í fimmta sæti er til dæmis Castello di Brolio frá Barone Ricasole og annað Toskanavín, Flaccianello frá Fontodi í því áttunda. Brunello-vínið Castelgiocondo frá Frescobaldi, sem lengi var selt hér á landi, er í fimmtánda sæti, hið argentínska Bodeca Colomé Malbec er í 33. sæti, Peter Lehman Barossa Shiraz í 54. sæti og Trimbach Riesling í 55. sæti.
Terrunyo Carmenére frá Concha y Toro er í 63. sæti, Bodega Catena Zapata Malbec í 69. sæti, Jacob’s Creek Riesling í 73. sæti og Stump Jump Shiraz frá d’Arenberg í 82. sæti.
Hin austurríski Brundlmeyer er svo í 93. sæti með Gruner Veltliner Berg-Vogelsang.
