Kanadíska vínhúsið Mission Hill í Okanagan Valley í Bresku Kolúmbíu leggur mikið upp úr list og menningu og heldur reglulega sýningar í hinum glæsilegu húsakynnum sínum. Að undanförnu hafa listaverk eftir Steinunni Þórarinsdóttur verið til sýnis í Mission Hill undir yfirskriftinni „Encounters with Iceland“. Alls eru 42 listaverk til sýnis umhverfis vínhúsið og verður sýningin opin fram í desember.
Anthony Mandl, eigandi Mission Hill, kynntist verkum Steinunnar á ferðalagi um Ísland í fyrra og segist þegar í stað hafa séð verkin fyrir sér í kringum vínhúsið. Steinunn kom sjálf og valdi staði fyrir stytturnar og var einnig viðstödd opnun sýningarinnar.
