Svarti miðinn frá Torres eða Mas La Plana er vínið sem segja má að hafi gert Miguel Torres heimsfrægan er það skákaði mörgum af þekktustu vínum heims í frægri smökkun skipulagðri af Gault-Millau á áttunda áratugnum.
Árgangarnir af Mas La Plana eru nú í kringum fjórða tuginn og þetta vín hefur fyrir löngu tryggt sig í sessi sem eitt af flaggskipum spænskrar víngerðar. Sumarið 2004 var mjög heitt á Spáni sem leynir sér ekki í þessu 100% Cabernet Sauvignon-víni, sem í stílnum er meira Napa en Bordeaux.
Átján mánuðir á frönskum eikartunnum leyna sér ekki í nefinu, þykk angan af reykelsi og vanillu, sultuðum dökkum berjum og plómum. Öflugt og tannískt í munni, með djúpum, krydduðum sólberjaávexti og langri endingu. Umhellið. Mun eldast vel í 5-10 ár.
Með villibráð, nautakjöti og önd, t.d. önd með rifsberjasósu
4.590 krónur
