La Primavera hættir rekstri

Veitingastaðurinn La Primavera í Austurstræti hefur hætt rekstri. Tækjakostur og búnaður hefur verið seldur nýjum eigendum en veitingastaðnum hefur verið lokað. Eigendur La Primavera eru hjónin Leifur Kolbeinsson, matreiðslumeistari og Jónína Kristjánsdóttir, framreiðslumaður. Þau opnuðu veitingastaðinn Kolabrautina í tónlistarhúsinu Hörpu í byrjun sumars.

Saga La primavera hófst í Húsi verslunarinnar árið 1993 en flutti á aðra hæð í húsinu númer 9 við Austurstræti í Reykjavík þan 22. Mars 1996 og hefur verið starfræktur þar óslitið síðan. Á La primavera sameinaðist matarhefð frá Norður Ítalíu og úrvals íslenskt hráefni. La Primavera tók þátt í matarhátíðinni Food and fun frá upphafi.

Leifur Kolbeinsson eigandi La Primavera, segir í frétatilkynningu; „Auðvitað er mikil eftirsjá að La Primavera. Við höfum átt þar frábæra tíma og kynnst gríðarlega mörgum góðum og traustum viðskiptavinum. Nú er hins vegar svo komið að Kolabrautin tekur allan okkar tíma og orku. Við ákváðum því að hætta rekstri La Primavera og einbeita okkur eingöngu að Kolabrautinni. Nafnið La Primavera verður áfram í okkar eigu og aldrei að vita hvar það kann að birtast á nýjan leik eða undir hvaða formerkjum. Ég vil nota þetta tækifæri og þakka öllum okkar viðskiptavinum, starfsfólki og birgjum fyrir gott og farsælt samstarf þann tíma sem La Primavera var í rekstri.“

Deila.