Þessar kjötbollur eru bragðmiklar en það er hins vegar djúp og kröftug sósan sem er lykilatriðið í þessari uppskrift.
Kjötbollurnar
- 350 g nautahakk
- 350 g svínahakk
- 1 dl mjólk
- 1 steinseljubúnt, fínsaxað
- 1 sneið ljóst brauð, skorpan skorin frá, fínsaxað
- 1 egg
- 1,5 dl nýrifinn Parmesan-ostur
- 2 tsk Maldon-salt
- 1 tsk nýmulinn pipar
- 2 msk ólívuolía
Sósan
- 2 skalottulaukar, fínsaxaðir
- 2 msk Dijon-sinnep
- 2 msk Sherry-edik (eða gott vínedik)
- 2 msk grænpiparkorn
- 1 dl brandý eða dökkt romm
- 2,5 dl rauðvín
- 1 dl púrtvín
- 2,5 dl nautasoð
- 1 dl matreiðslurjómi/rjómi
Byrjið á því að útbúa kjötbollurnar. Blandið öllu vel saman í stórri skál og mótið síðan litlar kjötbollur á stærð við golfkúlur. Gott er t.d. að nota ísskeið við að móta kúlurnar. Æskilegt er að leyfa kjötbollunum að standa í smá stund áður en þær eru steiktar, t.d. klukkustund í ísskáp. Það er þó ekki nauðsynlegt.
Hitið olíu á pönnu og brúnið kjötbollurnar vel. Setjið þær í eldfast mót og inn í 100 gráðu heitan ofn.
Mýkið skalottulaukinn í sömu pönnu og kjötbollurnar voru steiktar í. Þegar búið er að mýkja laukinn í um 2 mínútur er sérrí-ediki, brandý og sinnepi. Blandið saman og sjóðið niður í 2-3 mínútur. Þá er rauðvíninu og púrtvíninu hellt út á pönnuna. Ef þið eigið ekki púrtvín er hægt að nota rauðvín þess í stað. Sjóðið niður um helming, 10-15 mínútur.
Bætið næst nautasoðinu út á ásamt grænu piparkornunum. Áður en piparkornin eru sett út eru þau tekin úr leginum og mulin. Það má gera t.d. með því að renna kökukefli yfir þau 1-2 sinnum. Sjóðið niður um helming, um 10 mínútur.
Setjið nú kjötbollurnar aftur út á pönnuna ásamt rjómanum. Hækkið hitann aðeins og sjóðið hressilega í 2-3 mínútur. Berið fram.
Með þessu má bera fram pasta, kartöflur (soðnar nýjar eða steikta/bakaða báta) eða hrísgrjón.
Hér þarf ágætlega kröftugt rauðvín, sósan er mjög frönsk í stílnum og því varð Perrin Cotes-du-Rhone Villages fyrir valinu.
