Guðrún Jenný bloggar:„Apabrauð“ – þetta tryllti lýðinn á heimilinu!

Ég er sjúk í allt með kanil og þegar ég rakst á þessa uppskrift þá bara varð ég að prófa (ath. bollamálin eru amerísk).

Deigið:

  • 2 msk smjör
  • 1 bolli mjólk
  • 1/3 bolli vatn
  • ¼ bolli sykur

Setjið smjör, mjólk, vatn og sykur saman í lítinn pott og hitið þar til smjörið er bráðnað.

  • 2 ¼ tsk þurrger
  • 3 ¼ bolli hveiti
  • 2 tsk salt

Blandið þurrefnunum saman – ég geri það í hrærivélaskál.  Þegar smjörið og mjólkin hafa aðeins kólnað (ca 37 gráður) þá er hrærivélin sett í gang og blöndunni hellt varlega út í hveitiblönduna.   Ég er svo löt ég nenni ekki lengur að hnoða deig, heldur læt hrærivélina um þetta.

Deigið er svo látið hefast í ca klukkustund – munið að hylja skálina á meðan annars verður það þurrt (mér finnst plastfilma góð til þessara nota).

Þegar deigið hefur hefast þá búið þið til litlar kúlur úr deiginu.

Bræðið ½ bolla af smjöri.  Blandið saman 1 bolla af púðursykri og 2 ½ tsk kanil.  Veltið nú kúlunum fyrst upp úr smjörinu og svo upp úr kanilsykursblöndunni.  Kúlunum er svo raðað í smurt hringform.

Nú þarf deigið að hefast aftur í ca 45 -60 mín.  Á meðan hitiði ofninn í 180°C.  Skellið forminu inn í ofninn og bakið í ca 20-25 mín.  Passið að baka ekki of lengi.

Deila.