Saga og örlög Rioja á Spáni og Bordeaux í Frakklandi fléttast saman á margvíslegan hátt. Eitt dæmi um það er saga Forner-fjölskyldunnar sem að flúði til Frakklands þegar að spænska borgarastyrjöldin var í hámarki. Enrique Forner (sem kallaði sig Henri í Frakklandi) hafði verið í vínbransanum áður en hann flúði land og hélt því áfram í Frakklandi. Hann byrjaði með vínsölu í Rhone og Loire og endaði á lokum með því að kaupa tvö þekkt vínhús á Médoc-skaganum í Bordeaux, annars vegar Chateau Camensac og hins vegar Chateau Larose Trintaudon.
Það kom hins vegar að því að ræturnar á Spáni toguðu fjölskylduna til baka og hún ákvað að koma sér fyrir í Rioja, ekki síst vegna tengsla víngerðar svæðisins við Frakklands. Árið 1970 stofnaði Forner vínhúsið Marques de Caceres og fékk Bordeaux-goðsögnina Emilie Peynaud til að aðstoða við víngerðina. Peynaud hafði tekið þátt í því að umbylta víngerð í Bordeaux og fól Forner honum að gera slíkt hið sama í Rioja.
Caceres er nú með þekktari vínhúsum Rioja. Reserva-vínið sem nú er í vínbúðunum er frá hinum stórfína 2014 árgangi. Það er dimmrautt og ungt á lit, angan krydduð, þykk, þar eru þroskuðbrómber og kirsuber, vindlakassi, örlítið leður og vanilla. Þetta er kröftugt og aflmikið vín, mikil tannín, vínið þykkt, langt og þétt. Má vel umhella.
2.990 krónur. Frábær kaup. Fær hálfa auka stjörnu fyrir frábær gæði miðað við verð. Þetta er vel fyrir vel hangið nautakjöt og lambakjöt, jafnvel hreindýr.
-
10
