Charon-sósan er klassísk frönsk sósa, náskyld Béarnaise og er yfirleitt notuð með fiski. Hún er til dæmis tilvalin með sólkola eða rauðsprettu.
Hráefni
- 1/2 dl vínedik
- 1/2 dl hvítvín
- 2 skalottulaukar, saxaðir
- 2 msk fínt saxað estragon
- 2 msk, fínt söxuð steinselja
- 10 svört piparkorn
- 1 lítil dós tómatakraftur
- 3 eggjarauður
- 150 gr smjör
Aðferð
- Setjið edik, hvítvín, skalottulauk og estragon í pott.
- Merjið piparkornin í morteli og setjið út í eða piprið vel með piparkvörn.
- Sjóðið niður þar til um ein matskeið er eftir.
- Bætið þá við tómatkrafti og einni matskeið af vatni. Pískið saman.
- Bætið eggjarauðunum saman við og pískið áfram á vægum hita þar til þær fara að þykkjast.
- Bætið smjörinu smám saman við og pískið allan tímann.
- Hellið í gegnum síu og bætið saxaðri steinseljunni við. Ef sósan skilur sig er hægt að kippa henni í liðinn með því að píska matskeið af köldu vatni saman við.
Charon-sósa er afbragð með fiski og hér á myndinni er hún borin fram með grilluðum sólkola. Skerið þvert yfir fiskinn niður að miðjubeininu á báðum hliðum. Penslið með ólívuolíu, saltið, piprið og kreystið smá sítrónu yfir. Setjið álpappír á grillið og grillið fiskinn. Hann þarf ekki langan tíma, 5-8 mínútur eftir þykkt. Berið fram á fati ásamt grilluðum kartöflubátum, fersku salati og Charon-sósunni.
Með þessu gott hvítvín, s.s. Pascal Lachaux Bourgogne Blanc.
