Er virkilega hægt að nota kók í sósu með góðum árangri? Uppskrift sem birtist í Jólablaði Morgunblaðsins árið 2004 vakti upp þá spurningu. Uppskriftin hefur verið þróuð áfram og tekið nokkrum breytingum, meðal annars hefur smá rauðvín bæst við samhliða kókinu í sósunni, sem gefur henni meiri þyngd og dýpt og mildar sætuna.
Fyrir 6: 2,5 kg hamborgarhryggur
Setjið hrygginn í pott ásamt 2 lárviðarlaufum og nokkrum negulnöglum og piparkornum. Látið suðuna koma upp og sjóðið á vægum hita í 45 mínútur.
Leyfið hryggnum að kólna aðeins og skerið þá af beininu.
Útbúið sykurhjúpinn á meðan.
Sykurhjúpur
- 2,5 dl sykur
- 1/2 dl vínedik eða sideredik
- 1 dl tómatsósa
- 1 dl rjómi
- 1/2 dl Dijon sinnep
Bræðið sykur og edik saman í þykkum potti. Þegur sykurbráðin fer að taka á sig brúnan lit er sinnepi, tómatsósu og rjóma bætt saman við. Hrærið vel saman og látið malla þar til blandan verður þykk.
Haldið 1 dl af hjúpnum til haga en smyrjið restinni á hrygginn. Setjið hann á fat og inn í 175 gráðu heitan ofn í hálftíma.
Kóksósa
- 1 dl af sykurhjúpnum
- 2 dl af soðinu
- 2 dl Coca Cola
- 2 dl rauðvín
- 2 dl rjómi
Setjið soðið, kókið, rauðvín og sykurhjúpinn í pott. Látið suðu koma upp, lækkið hitann og látið malla á vægum hita þar til búið er að sjóða niður um helming. Bætið rjóma saman við og látið malla áfram í 10-15 mínútur þar til sósan er orðin þykk og bragðmikil.
Ef þið vijið mikla sósu er bara að tvöfalda skammtinn.
Berið fram með hefðbundnu meðlæti til dæmis heimatilbúnu rauðkáli og kartöflum.
