Jasmín önd með rúsínum

Það er rík hefð fyrir því að elda önd bæði í Frakklandi og Kína og hér mætast brögð úr þessum tveimur megineldhúsum í sósunni með öndinni.

Hráefni:

  • 3-4 andarbringur (gerið ráð fyrir 200-250 g á mann)
  • 100 g rúsínur
  • jasmínte í sem hæstum gæðaflokki
  • 3 dl andarsoð (Oskar andarkraftur + vatn)
  • 3 dl appelsínusafi
  • 2 dl De Kuyper Cherry líkjör
  • 1 dl koníak/brandí
  • 1 dl sykur
  • 1/2 lime, safinn pressaður
  • 2 msk smjör
  • 1 msk sojasósa

Rúsínurnar

Hitið 3 dl af Jasmínte. Setjið rúsínurnar í skál og hellið teinu yfir. Leyfið nokkrum telaufum að fylgja með. Lokið með álpappír og geymið í ísskáp yfir nótt.

Sósan:

  1. Hitið smjörið og sykurinn saman á pönnu þar til að sykurinn bráðnar og byrjar að brúnast.
  2. Bætið appelsínusafa og sojasósu út á og sjóðið niður um helming.
  3. Í öðrum potti er líkjörinn og koníakið/brandíið soðið niður um 2/3 eða þar til um 1 dl er eftir.
  4. Andakrafturinn er hitaður skv. leiðbeiningum.
  5. Blandið líkjörnum og appelsínusoðinu saman og loks heitum andarkraftinum. Látið suðu koma upp og leyfið að malla í um 10 mínútur.  Bragðið á sósunni og staðreynið að hún sé orðin bragðmikil og fín.
  6. Lækkið hitann niður fyrir suðupunkt. Bætið einni vænni matskeið af jasmín-telaufum út í og hrærið saman í um eina mínútu.
  7. Bætið pressaða lime-safanum saman við. Smakkið og saltið og piprið eftir þörf. Síið sósuna og geymið.
  8. Hitið andarbringurnar samkvæmt þessum leiðbeiningum hér.
  9. Skerið bringurnar í sneiðar og raðið á diska.
  10. Hitið sósuna og hellið á diskana.
  11. Hitið rúsínurnar í teinu. Síið vökvann frá og deilið rúsínunum í telaufunum á diskana.

Gott meðlæti eru kartöflur Pommes Duchesse.

Með þessu gott Bordeaux-vín t.d. Tourelles de Longueville eða Ítali á borð við Isole e Olena.

 

 

 

Deila.