Kjúklingur er fínn hversdagsmatur sem auðvelt er að gera góða máltíð úr. Og svo verður auðvitað að hafa gott salat með en þetta er í miklu uppáhaldi hjá okkur.
En fyrst að kjúklingnum og gulrótunum.
- 1 kjúklingur bútaður í bita
- 400-500 g gulrætur, skornar í grófa bita
- 1-2 rósmarínstönglar
- 2 tsk salvía
- salt og pipar
- ólífuolía
Skerið gulræturnar niður í bita og setjið í eldfast form ásamt rósmarínstönglunum. Sáldrið smá Maldon-salti og góðri ólífuolíu yfir. Raðið kjúklngabitunum yfir og kryddið með salvíu, salti og pipar.
Eldið við 200 gráður í um 45-50 mínútur eða þar til kjúklingurinn er fulleldaður. Snúið bitunum við eftir um 30 mínútur.
Og á meðan má gera salatið en í það þarf:
- lambhagasalat/romaine eða annað gott salat
- 1 rauð paprika
- 1/2 agúrka
- kirsuberjatómatar
- skalottulaukur
- 1 lúka steinselja, helst flatlaufa
- 1 væn lúka valhnetur
- 2-3 msk súltaninur
- Pecorino Romano (eða Parmesan)
- fyrsta flokks ólífuolía
- Maldon salt og nýmulinn pipar
Setjið hneturnar á bökunarpappír inn í 200 gráða ofn í um 4-5 mínútur.
Skerið grænmetið mjög smátt og setjið í skál. Fínsaxið skalottulaukinn og steinseljuna og blandið saman við. Grófsaxið hneturnar og setjið í skálina ásamt súltanínum. Blandið smá skvettu af hágæða ólífuolíu saman við. Eftir því sem hún er betri þarf að nota minna. Rífið Pecorino Romano ost yfir eftir smekk. Kannski 2-3 matskeiðar. Bragðið til með salti og pipar.
