Skyrtertur eru alltaf vinsælar og þær gerast ekki mikið ljúffengari en þessi skyrterta sem er bragðbætt með vanilludropum og þakin sætum hjúp úr Grenadine og berjalíkjör.
Botninn
- 200 g Grahams Digestive hafrakex
- 75 g smjör
Myljið kexið í matvinnsluvél og bætið síðan smjörinu út í. Þekjið botninn í 25 sm smelluformi með kexblöndunni.
Skyrblandan
- 1 kg hreint skyr
- 5 dl rjómi
- 200 g sykur
- 2 egg
- 3 eggjarauður
- 1 msk vanilludropar
- 9 matarlímsblöð
- 1 dl vatn
Leggið matarlímsblöðin í bleyti í köldu vatni.
Þeytið saman eggin, eggjarauðurnar og sykurinn þar til að blandan er orðin létt og ljós. Að minnsta kosti fimm mínútur.
Í annarri skál er rjómi, skyr og vanilludropar þeyttir saman.
Hitið 1 dl af vatni upp að suðu og takið af hitanum. Takið matarlímsblöðin úr kalda vatninu og kreystið vatnið úr þeim. Setjið blöðin í heita vatnið og leysið upp.
Þeytið matarlímsblönduna rólega saman við eggjablönduna. Þeytið þeirri blöndu síðan varlega saman við skyrblönduna. Hellið í formið ofan á kexbotninn.
Geymið í ísskáp á meðan tertan er að stífna.
Grenadinehjúpur
- 50 ml Grenadinesíróp
- 50 ml berjalíkjör, t.d. Créme de Cassis eða De Kuyper Wild Strawberry
- 50 ml vatn
- 2 matarlímsblöð
Mýkið matarlímsblöðin í köldu vatni. Hitið Grenadine, líkjör og vatn. Kreystið kalda vatnið úr matarlímsblöðunum og leysið upp í heitri blöndunni. Leyfið að kólna og hellið siðan yfir kökuna. Geymið kökuna í ísskáp á meðan hjúpurinn er að stífna.