E. Guigal Cotes du Rhone 2010

Guigal er eitt virtasta vínhús Frakklands og þekktast er það fyrir hin tignarlegu einnar ekru vín sín frá Cote Rotie, en þau teljast til bestu og eftirsóttustu vína veraldar. En Guigal framleiðir ekki bara rándýr ofurvín heldur líka einhvern besta Cotes du Rhone sem er framleiddur. Grenache og Syrah nokkurn veginn til helminga ásamt örlitilli „skvettu“ af Mourvédre í blöndunni.

2010 árgangurinn kemur í kjölfar hins stórkostlega 2009 árgangs í Rhone og stendur sig bara prýðisvel og gott betur í samanburðinum. Stökkið á milli árganga alls ekki mikið. Í nefinu dökkur, kryddaður ávöxtur, skógarber, plómur, rabarbari og kirsuber. Vel strúktúrerað, þétt tannín, sýra í bland við kryddaðan ávöxt. Þetta er ekta vín fyrir lambakjöt, hvort sem er af ofni eða grilli, gjarnan með kryddjurtum á borð við rósmarín, óreganó og salvíu.

2.599 krónur. Mjög góð kaup.

Deila.