Bananakökur hafa lengi verið vinsælar á Íslandi og það sama má segja um kökur með karamelluhjúp. Hér er þetta sameinað í einni unaðslegri köku.
Karamelluhjúpur
- 3 dl rjómi
- 100 gr.púðursykur
- 50 grömm smjör
- 170 gr síróp (dökkt eða ljóst)
Kakan
- 250 gr.hveiti
- 1 1/2 tsk lyftiduft
- 175 gr. mjúkt smjör
- 135 gr. púðursykur
- 2 egg
- 3 þroskaðir bananar
- 1 stór skeið hunang
- 1 1/2 tsk vanilludropar
Karamelluhjúpur: Blandið öllu saman í pott og hitið þar til sykurinn hefur leysts upp, hrærið stöðugt í á meðan. Leyfið karamellunni síðan að sjóða upp og látið malla í 15-30 min eða þar til búið er að sjóða hana niður í um 4 dl.
Kakan: Hrærið saman smjörinu og púðursykrinum. Bætið eggjunum síðan út í, einu í einu. Bætið síðan bönunum, vanilludropum og hunangi saman við. Að síðustu er hveitinu bætt út í og lyftiduftinu. Hellið deiginu í form (ég var með 23×33 sm) og bakið við 180 C° í um hálftíma. Það er gott að setja smjörpappír í formið til að auðveldara sé að taka hana upp úr. Takið þá kökuna út og hellið um helmingnum af karamellunni yfir og setjið aftur inn í ofninn í um 5-10 mín. (Athugið það gæti þurft að hita karamelluna aðeins upp ef hún hefur kólnað á meðan þið gerðuð kökuna). Restina af karamellinu er svo hægt að bera fram með kökunni.
