Kjötbollur eru eitt af því sem Bandaríkjamenn hafa tekið úr ítalska eldhúsinu og gert að sínu. Þessi uppskrift er okkar útgáfa af uppskrift frá veitingahúsinu Frankie’s Spuntino í Brooklyn en þangað mun hún hafa borist frá Napólí á Ítalíu, ekki síst það að nota bæði furuhnetur og rúsínur í bollurnar. Pecorino-ost er hægt að fá í betri ostaborðum og ostabúðum. Það er líka hægt að nota Parmesan.
- 800 g nautahakk
- 2 brauðsneiðar
- 1 dl rúsínur
- 1 dl furuhnetur
- 1 dl fínt rifinn Pecorino
- 1 lúka fínt söxuð flatlaufa steinselja
- 4 stórir hvítlauksgeirar, pressaðir
- 3 egg
- heimatilbúið rasp
- 2 tsk sjávarsalt
- 1 tsk hvítur pipar
Byrjið á því að leggja brauðsneiðarnar í bleyti í vatni í smástund. Takið þær upp, kreystið mesta vatnið úr þeim og setjið í stóra skál. Setjið önnur hráefni í skálina (nema raspið) og blandið vel saman með höndunum. Bætið síðan raspi út í 1-2 msk í einu þar til að blandan er orðin þannig að hægt er að móta bollur með góðu móti. Þarf rúman 1 dl af raspi (þið gerið raspið með því að nota brauð sem farið er að harðna eða með því að rista brauðið í rist eða í ofni og mylja síðan niður í matvinnsluvél).
Mótið stórar kjötbollur. Miðið við að þær séu ca eins og mandarínur að stærð. Úr uppskriftinni eiga að koma 12 bollur.
Setjið smjörpappír á bökunarplötu og raðið kjötbollunum á plötuna. Eldið við 180 gráður í um hálftíma.
Á meðan gerið þið tómatasósu:
- 5 dl tómatapassata
- 1 laukur
- 6 hvítlauksgeirar
- óreganó
- chiliflögur
- rauðvínsskvetta (ef þið eigið það til)
- ólífuolía
Saxið laukinn og sneiðið hvítlaukinn fínt. Hitið olíu í potti. Mýkið laukinn í nokkrar mínútur, bætið hvítlauknum út í , kryddið með óreganó og chiliflögum og eldið áframí 2 mínútur eða svo. Hellið rauðvínsskvettu í pottinn og látið sjóða niður. Bætið nú tómatapassata út í pottinn og leyfið þessu að malla í 20-30 mínútur.
Setjið tómatasósu á diska og síðan bollurnar ofan á. Rífið Pecorino-ost yfir.
Það er auðvitað líka hægt að hafa pasta með, t.d. spaghetti eða tagliatelle og blanda því saman við tómatasósuna.
Sangiovese-vín frá Toskana passa mjög vel við þessar bollur, t.d. Cecchi Chianti.
Fjölmargar aðrar spennandi uppskriftir að kjötbollum finnur þú með því að smella hér.
Fleiri ítalsk-amerískar uppskriftir eru svo hér.