Þetta er afskaplega sumarlegt og gott salat. Ristuðu möndlurnar gefa því bit og salatsósan með hunangi og sítrónu mikinn ferskleika. Það er tilvalið að nota jöklasalat, Romaine eða Salanova.
Byrjið á því að rista möndlurnar. Takið 1-2 lúkur af heilum möndlum og myljið mjög gróft. Það má gera í matvinnsluvél eða einfaldlega með kökukefli eða kjöthamar.
Setjið bökunarpappír á plötu og dreifið úr möndlumylsnunni. Ristið í miðjum ofni við 180 gráður í rúmar fimm mínútur eða þar til til að möndlurnar byrja að taka á sig smá lit. Passið að brenna þær ekki.
Pískið saman vinaigrette-salatsósuna.
- 1 sítróna, safinn og rifinn börkur
- 1/2-1 dl ólífuolía
- 1 skalottulaukur, fínt saxaður
- 1 msk hunang
- 1/2 tsk sjávarsalt
Rífið börkinn af sítrónunni með fínu rifjárni. Pressið safann úr henni og setið í litla skál eða bolla ásamt sítrónuberkinum. Setjið hunangið út í og látið það leysast upp í safanum. Pískið olíunni saman við. Bætið fínt söxuðum skalottulauknum út í og saltinu.
Setjið nú rifið salat í skál ásamt vænni lúku af fint saxaðri steinselju og annarri lúku af fínt söxuðum graslaukum. Bætið ristuðu möndlunum og vinaigrette-sósunni saman við. Blandið vel saman og berið fram.
Fjölmargar og fjölbreyttar uppskriftir af salati finnið þið svo með því að smella hér.