Gérard Bertrand Pic St. Loup 2017

Franska orðið Pic þýðir tindur og Pic Saint Loup er einmitt fjallstindur sem að setur sterkan svip á sveitina í kring sem er um 20 kílómetra eða svo norður af borginni Montpellier í suðurhluta Frakklands. Þarna mætast tvö veðurfarsleg svæði, það þar sem Miðjarðarhafið er ríkjandi og það þar sem hálendið inni í landi ræður veðrinu. Við þetta myndast mjög forvitnilegar aðstæður fyrir vínrækt þar sem loftslagið er ögn svalara en á mörgum öðrum svæðum í Languedoc.

Þetta rauðvín er úr Grand Terroir línunni frá Gérard Bertrand og er blanda úr þremur suðurfrönskum þrúgum, Grenache, Syrah og Mourvédre.

Vínið er rauðfjólublátt og ávöxturinn er heitur og sólríkur, plómur og krækiber, angan af ferskum kryddjurtum, mold og jörð, kröftugt, ungt og mikið, þétt, öflug en mjúk tannín, massamikið.

90%

2.799 kronur. Frábær kaup. Með lambakjöti og miðjarðarhafskryddjurtum á borð við rósmarín og óreganó.

  • 9
Deila.