Canas-fjölskyldan hefur stundað vínrækt á svæðinu Rioja Alavesa í um tveggja alda skeið og víngerð undir eigin nafni allt frá árinu 1928 þegar vínhúsið Bodegas Luis Canas stofnað. Ekrur fjölskyldunnar eru hátt yfir sjávarmáli í Rioja Alavesa og er lögð rík áhersla á að vínræktin sé eins græn og náttúruvæn og kostur er.
Árið 2015 var góður árgangur í Rioja, aðstæður heitar og þurrar út uppskeruna sem var óvenjulega snemma á ferðinni, henni lokið um miðjan október hjá nær öllum vínhúsum. Tempranillo er auðvitað ríkjandi í þessu víni en það er líka 5% Graciano í blöndunni og eikin bæði frönsk og amerísk.
Þetta vín hefur að okkar mati verið með bestu kaupunum í sínum verðflokki Rioja-vína og það mat stendur óhaggað. Liturinn dökkur, þéttur og djúpur, ávöxturinn í nefinu dökkur og sætur, krækiber og svört kirsuber, umvafinn sætri, eikinni, mildri vanillu og kaffi, vottur af anís. Kröftugt en fágað, tannín þétt, mild, áferðin þurr og nokkuð míneralísk.
3.690 krónur. Frábær kaup. Með rauðu kjöti, lambi eða nauti.
-
10
