Agricola San Felice er með þekktari vínhúsum Toskana og framleiðir vín frá þekktustu svæðum héraðsins s.s. Montalcino, Maremma og Chianti Classico. Meðal þekktari vína hússin er Brunello-vínið Il Quercione. Hér er hins vegar á ferðinni vín sem heitir Contrada, eitt af ódýrari vínum San Felice. Það var upphaflega gert fyrir Palio di Siena hinar þekktu kappreiðar í borginni SIena þar sem fulltrúar 10 af borgarhlutunum 17- sem kallast Contradi – ríða í fornum búningum um hið fræga torg Piazza del Campo.
Vínið er flokkað sem IGT enda eru franskar þrúgur notaðar (Merlot og ögn af Cabernet Sauvignon) í bland við hina hefðbundnu þrúgu Toskana, Sangiovese. Angan er ávaxtarík og mjúk, kirsuber og rauð ber, ungt og þægilegt. Ávöxtur ríkjandi í munni, þó einnig votti fyrir reyk og kryddi. Mjög aðgengilegt og ljúft vín.
2.195 krónur. Góð kaup.
