Súkkulaðibitakökur með Nutella

Dóttir mín kom til mín með hvolpaaugun sín og bað mig um að baka þessar súkkulaðibitakökur. Það þurfti ekki að sannfæra mig lengi enda er nutella og súkkulaði í miklu uppáhaldi hjá mér. Hvað gerir maður ekki fyrir börnin sín ?

  • ca 1/2 dós Nutella
  • 225 gr ósaltað smjör
  • 280 gr hveiti
  • 1 1/4 tsk matarsódi
  • 1/2 tsk sjávarsalt
  • 200 gr púðursykur
  • 100 gr sykur
  • 1 stórt egg + 1 eggjarauða
  • 2 1/2 tsk vanilludropar
  • 1 tsk grískt jógúrt
  • 100 gr dökkir súkkulaðidropar
  • 100 gr ljósir súkkulaðidropar.

Það er skynsamlegt, áður en maður byrjar á bakstrinum að setja Nutella inn í ísskáp eða búa til litlar kúlur sem hver fyrir sig er 1-1 1/2 tsk af nutella á smjörpappir sem síðan eru settar inn i frysti. Það getur líka verið nóg að setja nutelladósina inn í ísskáp í smá stund áður en nútellað er sett í deigið.

Byrjið á því að bræða smjörið á meðalhita á pönnu. Leyfið smjörinu að eldast áfram og hrærið stöðugt í á meðan.Þegar smjörið er farið að freyða og  taka á sig lit takið þið smjörið af hitanum, passið uppá að það brenni ekki við. Hellið smjörinu í skál og leyfið að kólna aðeins.  Blandið saman hveitunu,matarsódanum og saltinu.

Hrærið smjörinu og sykrinum saman og bætið síðan eggjunum út í. Næst vanilludropunum og jógúrtinu. Að lokum setjið þið súkkulaðidropana út í. Það er gott að kæla deigið aðeins  í ísskáp áður en kúlurnar eru mótaðar ásamt nutellanu.

Bakast við 180 gráður í cirka 14 mín

Deila.