Risotto með ítölskum kjötbollum

Risotto er hægt að gera á margvíslega vegu. Hér höldum við áfram að leika okkur með „ítalskar pylsur“ en í stað þess að gera pylsur mótum við kjötblönduna í litlar kjötbollur.

Risotto

  • 4 dl Arborio-hrísgrjón
  • 3 skalottulaukar, fínsaxaðir
  • 1 lítri soð úr góðum kjötkrafti
  • 1 búnt steinselja, fínsöxuð
  • 50 g parmesan, rifinn
  • 2 msk smjör
  • salt og pipar

Ítalskar „salsiccie“ kjötbollur

  • 500 g grísahakk
  • 2-3 hvítlauksgeirar
  • 1 msk óreganó
  • 1 msk fennel
  • 1 tsk paprika
  • 1/2-1 tsk chiliflögur
  • 1/2 tsk laukkrydd (má sleppa)
  • Maldonsalt
  • nýmulinn pipar

Blandið öllu vel saman og mótið mjög litlar bollur.

Hitið smjörið á pönnu og mýkið laukin. Bætið næst grjónunum út á. Þegar að þau eru orðin vel heit er rauðvíninu hellt út á og soðið að mestu niður. Nú má byrja að ausa soðinu út á þannig að það þekji grjónin. Bætið við soði eins og þarf þar til að grjónin eru fullelduð. Það á að taka um 18-20 mínútur.

Á meðan eru kjötbollurnar steiktar á annarri pönnu.

Þegar að grjónin eru tilbúin er bollunum, ostinum og steinseljunni blandað saman við grjónin. Bragðið til með salti og pipar.

Að sjálfsögðu ítalskt rauðvín með á borð við Torre del Falco Nero di Troia.