Gott humarsoð er mikilvægur og nauðsynlegur grunnur í góðar sósur og humarsúpur. Það er auðvitað nauðsynlegt að eiga humarskeljar. Það er því hægt annaðhvort að skelhreinsa humarinn einhverjum klukkustundum áður en á að elda hann til að ná skeljunum eða þá að sýna fyrirhyggju og frysta skeljar þegar verið er að hreinsa humar þannig að maður eigi ávallt til skeljar í gott soð. Síðan er líka tilvalið að frysta afgangssoð.
- 15-20 humarskeljar
- 2 laukar, grófsaxaðir
- 1 gulrót, söxuð
- smá steinseljurót, söxuð
- 2-3 msk tómatapúrra
- 1 tsk fennel
- 1 tsk óreganó
- smjör
- pipar
Hitið smjörið í þykkum potti. Byrjið á því að steikja grænmetið í 4-5 mínútur. Bætið þá humarskeljunum saman við og brúnið þar til þær taka á sig lit. Þá er kryddunum og tómatapúrrunnu bætt saman við ásamt um 2 lítrum að vatni. Leyfið suðunni að koma upp og lækkið þá hitann og látið malla. Vökvann þarf að sjóða niður um ca 3/4 – 4/5. Bragðið á því eftir um klukkutíma og metið hvort að það sé orðið nógu bragðmikið. Þegar þið eruð ánægð er slökkt á hitanum. Gott er að láta soðið standa í pottinum í hálftíma, klukkutíma í viðbót til að draga í sig aukið bragð áður en það er síað.
Síið og geymið.
