Það þarf auðvitað ekki að spyrja að því hvaðan hugmyndin að þessari pizzu kemur. Taco og pizza njóta mikilla vinsælda í Bandaríkjunum og auðvitað tilvalið að reyna að splæsa þetta saman í eitt. Útkoman er bara lygilega góð.
Eins og alltaf byrjum við á pizzubotninum. Það er gott að fylgja þessum leiðbeiningum hér.
Áleggið
- 400-500 g nautahakk
- 1 bréf Taco-kryddblanda
- 1 dós Taco-sósa
- 1 bréf Gratín-ostur
- grænt salat – t.d. Romaine
- tómatar, t.d. vel þroskaðir kirsuberjatómatar
- 1 dós sýrður rjómi 10%
- 1 lime
- 1 væn lúka af söxuðum ferskum kóríander.
Hitið ofninn í 225 gráður.
Steikið nautahakkiið í olíu á pönnu. Kryddið með Taco-kryddinu. Fletjið botninn út. Smyrjið Taco-sósunni á hann og dreifið síðan hakkinu yfir. Sáldrið næst ostinum yfir. Bakið pizzuna í um 10 mínútur eða þar til botninn er fullbakaður og osturinn bráðnaður.
Á meðan er salatið saxað og tómatarnir sneiddir niður. Blandið saman við safann úr 1/2 lime og smá sjávarsalti.
Í skál er sýrði rjóminn pískaður saman við safann úr 1/2 lime og um 1 msk af vatni.
Þegar pizzan kemur úr ofninum er salatinu dreift yfir, síðan sýrða rjómanum og loks er söxuðum kóríander sáldrað yfir.
