Það er eitthvað svo Miðjarðarhafslegt við óreganó og sítrónu en sú blanda á afskaplega vel við grillaðan kjúkling. Einhver besta leiðin til að grilla kjúkling er að skera hann í „butterfly“.
Kryddlögur
- 2 sítrónur, safinn pressaður
- 1 dl hvítvín
- 1 dl ólívuolía
- væn lúka af fersku, söxuðu óreganó
- 2 msk ferskt timjan
- 1 laukur
- salt og pipar
Maukið saman í matvinnsluvél.
Skerið kjúklinginn í „butterfly“ samkvæmt þessum leiðbeiningum hér.
Setjið kjúklinginn eða kjúklingana (marineringin á alveg að duga fyrir tvo kjúklinga) í fat og hellið marineringunni yfir. Látið hana þekja kjúklinginn á báðum hliðum. Setjið plastfilmu eða álpappír yfir fatið og látið kjúklinginn marinerast í ísskáp. Það er best að láta hann liggja í nokkrar klukkustundir (þess vegna yfir nótt) í marineringunni.
Hitið grillið. Takið kjúklinginn úr ísskápnum um hálftíma áður en á að grilla hann þannig að hann nái stofuhita.
Setjið á grillið með skinnhliðina niður. Grillið í 3-4 mínútur. Snúið við, slökkvið á hitanum eða lækkið verulega beint undir kjúklingnum og grillið hann áfram undir loki þar til hann er fulleldaður. 25-30 mínútur.
