Baron de Ley Siete Vinas Reserva 2005

Þrúgurnar sem rækta má í Rioja-héraðinu á Spáni eru sjö talsins: Tempranillo, Graciano, Garnacha, Mazuelo, Viura, Malvasia og Garnacha Blanca. Þrjár fjórar fyrstu eru rauðar, hinar þrjár hvítar. Það er ekki oft – eiginlega nánast aldrei – sem að maður fær þær allar í einu og sama víninu. Það er hins vegar gömul hefð fyrir því í Evrópu að blanda saman hvítum og rauðum vínum, þekktustu dæmin eru líklega hin mögnuðu Cote Rotie í Frakklandi og Chianti vínin í Toskana á Ítalíu. Í víninu Siete Vinas sækir vínhúsið Baron de Ley innblástur í þessa gömlu hefð og útkoman er alveg hreint mögnuð. Mikið rauðvín þar sem hvítu þrúgurnar eru notaðar sem eins konar krydd.

Þetta er ekki dæmigert Rioja-vín, hvort sem horft er til klassíska stílsins né nýbylgjunnar, heldur flókið, margbrotið og mikið vín, ólíkt flestum öðrum frá Rioja.

Angan af framandi við, sandalvið, balsamvið, þurrkuðum kryddum og dökkum berjum og blómum, ristað. Öflugt, langt, margslungið, kröftug tannín en líka fersk sýra, úr hvítu þrúgunum. Nútímalegt, en með virðingu fyrir fortíðinni. Með flottri, stórri nautasteik.

4.998 krónur.

Deila.