Chile virðist geta framleitt endalaust af tæknilega vel útfærðum og heillandi vínum sem kosta ekki skildinginn. Og því kannski ekki að undra að það eru einmitt Chile-vín sem að Íslendingar sækja hvað mest í þessi misserin.
Vitral Chardonnay frá Vina Maipo er hvítvín frá Casablanca-dalnum, einu helst hvítvínshéraði Chile þar sem kalt loft frá Kyrrahafinu læðist yfir á nóttunni og kælir vínviðinn eftir sólbakstur dagsins. Það eru einmitt kjöraðstæður til framleiðslu á ferskum og ávaxtaríkum hvítvínum.
Þetta er dæmigerður Nýjaheims-Chardonnay. Suðrænn, sætur ávöxtur í nefi, ananas, bananar, ferskjur, þroskaður sítrus og örlítill vanillusykur, sem rekja má til eikarinnar. Mjúkt og svolítið feitt í munni, mild og góð sýra. Afskaplega notalegt sumarvín.
1.899 krónur. Frábær kaup á því verði sem tryggir víninu fjórðu stjörnuna.
