Naan með hvítlaukssmjöri

Það er mörgum sem að finnst ómissandi að fá sér hvítlauks-naan með indverskum mat. Það er hægur leikur að grilla naan-brauð. Við notum sömu grunnuppskrift og fyrir píta-brauðin:

  • 5 dl hveiti eða spelt (og auka til að hnoða)
  • 2 dl volgt vatn
  • 1/2 bréf þurrger
  • 1/2 tsk salt
  • 1/2 tsk sykur
  • 1 msk olía

Hrærið gerið, sykur, oliu og salt saman við volgt vatn og leyfið að standa í 5-10 mínútur eða þar til að vatnið fer að “freyða”. Hrærið gerblönduna og hveitið vel saman. Leyfið deiginu að hefa sig í 2-3 klukkustundir.

Setjið hveiti á vinnuflötinn og hnoðið deigið hressilega. Skerið í 4-6 bita og hnoðið hvern bita fyrir sig í kúllu. Leyfið kúlunum að standa undir viskustykki í smá stund og hefa sig upp aftur.

Fletjið kúlurnar út í flatböku með því að þrýsta á þær með höndunum.

Bræðið 50 g af smjöri. Bætið 2-3 matskeiðum af rifnum hvítlauk út í ásamt klípu af sjávarsalti. Penslið aðra hliðina á brauðunum og byrjið á því að grilla hana. Penslið smjöri og hvítlauk á hina hliðina áður en að þið snúið við. Penslið loks smá smjöri á brauðin áður en að þið takið þau af.

Aðra útgáfu af naan með hvítlauk og kóríander sem bökuð er í ofni finnið þið með því að smella hér. 

Með þessu þarf auðvitað góðan indverskan mat. Þið finnið allar indversku uppskriftirnar með því að smella hér.