Gríska matargerðin er dæmigerð Miðjarðarhafsmatargerð hvað hráefni varðar. Það leynir sér hins vegar ekki í mörgum uppskriftum að Grikkland er í austurhluta Miðjarðarhafsins. Í Kapama-kjúkling eða „Kota Kapama“ koma til dæmis krydd og brögð við sögu sem minna á Austurlönd nær.
- 1 stór kjúklingur, bútaður í átta bita
- 1 dós saxaðir tómatar
- 1 dós tómatapúrra
- 3 kanilstangir
- 1 tsk kanilkrydd
- 2 lárviðarlauf
- 1 lauxur, saxaður
- 3-4 hvítlauksgeirar, pressaðir
- 1 msk sykur
- 2 dl vatn
- smjör
- salt og pipar
- Parmesan-ostur
- 500 g smágert pasta, t.d. makaróní eða mini-penne
Kryddið kjúklingabitana með salti, pipar og kanil. Bræðið um 2 msk af smjöri í þykkum potti og brúnið kjúklingabitana vel.
Blandið saman maukuðu tómötunum, tómatapúrrunni, sykri og vatni. Hellið yfir kjúklinginn í pottinum og setjið svo kanilstengurnar og lárviðarlaufin útí.
Steikið laukin og hvítlaukin í smjöri á annarri pönnu og bætið síðan út í kjúklingapottinn. Látið malla undir loki í 50 mínútur.
Eldið pastað skv leiðbeiningum. Það er gaman að bera þennan rétt fram á stóru fati. Setjið soðið pastað á fatið og hellið síðan kjúklingaréttinum yfir.
Samkvæmt hinni upprunalegu grísku uppskrift á að bera fram rifinn Kefalotiri-ost með þessu öllu. Hann er hins vegar ekki fáanlegur hér á landi en Parmigiano eða Grana Padano getur vel komið í hans stað.
Með þessu kröftugt suður-evrópskt rauðvín á borð við Luzon Jumilla.
