Musar Jeune 2018

Chateau Musar er eitt merkilegasta vínhús heims. Það kemur frá afar ólíklegum stað, Bekaa-dalnum í Líbanon, steinsnar frá höfuðborginni Beirut, og á sér mjög harðsnúinn hóp aðdáenda. Ekrurnar eru í þúsund metra hæð yfir sjávarmáli sem temprar loftslagið og gerir kleift að rækta þarna vín sem minna um margt á suðurhluta Evrópu.

Hochar-fjölskyldan lagði grunninn að Chateau Musar í kringum 1930 og þrátt fyrir borgarastyrjaldir og stríðsátök hefur henni tekist að framleiða vín sín ár eftir ár, með tveimur undantekningum, 1976 og 1984. Það þarf gífurlegan eldmóð til að framleiða heimsklassavín undir þessum kringumstæðum og þegar breska víntímaritið Decanter hóf að útnefna „mann ársins“ árið 1984 var það Serge Hochar frá Musar sem fékk þann heiður í fyrsta skipti. Musar er líka fyrsta vínhús Líbanon til að öðlast lífræna vottun.

Flaggskipið er auðvitað sjálft Chateau Musar sem hér hefur verið fáanlegt um áratuga skeið en nú getum við líka gætt okkur á Musar Jeune eða „unga“ Musar. Blandan er Cinsault, Syrah og Cabernet Sauvignon og ólíkt Musar er vínið óeikað og ætlað að vera tilbúið til neyslu þegar að það er selt. Rétt eins og stóri Musar er þetta magnað vín, en mjög ólíkt. Chateau-vínið er villt ótemja, einstakt í vínheiminum, Jeune Musar er hins vegar massívt, klassískara, minnir um margt í stílnum á stór suður-frönsk vín. Þarna kemur vel í ljós hversu magnaður ávöxturinn er í vínum Musar,vínið er svarblátt á lit, sólber og sæt bláber í nefi umvafinn kryddum og reyk, negull og svartar ólífur, kröftug og fyrirferðarmikil tannín, fersk og mikil sýra, mjög þurrt. Gefið tíma til að opna sig. Vín sem má vel geyma í 3-5 ár.

 

90%

2.999 krónur. Frábær kaup. Með bragðmiklu kjöti, þess vegna villibráð.

  • 9
Deila.