Symington-fjölskyldan hefur lengi verið ein af meginstoðum víngerðarinnar í Douro-dalnum og stjórnar portvínshúsum á borð við Graham’s og Taylor’s. Líkt og margir aðrir portvínsframleiðendur hafa Symingtonarnir í auknum mæli horft til framleiðslu á hefðbundnum rauðvínum og hvítvínum úr þrúgum svæðisins og eru vínin frá Symington nú komin í fremstu röð léttvína frá Douro.
Altano-línan er nú aftur fáanleg á Íslandi, sem er mikið fagnaðarefni. Það er löngu tímabært að við förum að taka Douro-vínin og þrúguna Touriga Nacional upp á okkar arma, þetta eru vín sem falla mjög vel að íslenskum vínsmekk. Vínið er mjög dökkt á lit, svarfjólublátt. Ávöxturinn svartur, sólber, vottur af sveskjum samofinn bjartri, ferskri eik, einstaklega vel strúktúrerað vín, tignarlegt, hnarreist og með flottri sýru sem lyftir því upp og gefur ferskleika.
2.599 krónur. Frábær kaup. Vín fyrir rautt kjöt, jafnvel villibráð.
-
9
