Kínversk Five Spice önd

Þessi uppskrift er tímafrek að því leytinu til að það er ekki fyrr en á þriðja degi sem öndin er elduð. Biðin er hins vegar þess virði og hvert skref uppskriftarinnar er einfalt í framkvæmd.

Hráefni

  • 1 önd, 2,5-3 kíló
  • 5 sm stk engifer
  • 6 hvítlauksgeirar
  • 1/2 dl þurrt sérrí (fino)
  • 1/2 dl sojasósa
  • 1 msk sykur
  • 1 tsk Five Spice krydd
  • 1/2 dl balsamikedik
  • 1 dl hunang

Dagur 1

Skerið engiferstykkið niður í sneiðar og merjið með því að þrýsta hliðinni á eldhúshníf á þær. Merjið hvítlauksgeirana. Komið engifersneiðunum og hvítlauksgeirunum fyrir inni í öndinni.

Blandið saman sérrí (eða kínversku hrísgrjónavíni ef þið eigið það til), sojasósu, sykri og Five Spice. Setjið öndina í stóran frystipoka. Hellið blöndunni í pokan og þekið öndina vel með kryddleginum, bæði að innan og utan. Geymið í ísskáp í sólarhring. Gott er að snúa pokanum að minnsta kosti einu sinni.

Dagur 2

Takið öndina úr pokanum. Látið kryddlögin leka af henni og takið engifersneiðarnar og hvítlaukinn úr henni.

Sjóðið um 2 lítra af vatni. Setjið öndina í stórt sigti yfir vaski og hellið sjóðandi vatni yfir hana, helming á hvora hlið. Þerrið fuglinn með eldhúspappír og setjið í fat.

Sjóðið balsamikedik og hunang saman í nokkrar mínútur. Penslið blöndunni á öndina. Setjið öndina í ísskáp og geymið yfir nótt.

Dagur 3

Takið öndina úr ísskápnum a.m.k. eina klukkustund áður en hún er elduð þannig að hún nái stofuhita.

Hitið ofninn í 200 gráður. Setjið öndina á steikingarfat og eldið í um klukkustund. Látið bringurnar snúa niður fyrstu 20 mínúturnar en snúið henni þá við. Ef hún fer að dökkna of mikið er skynsamlegt að lækka hitann í 180 gráður síðustu 20 mínúturnar.

Endanlegur eldunartími ræðst af stærð fuglsins.

Meðlæti

1 búnt vorlaukur, sneiðið niður í þunnar ræmur

Sósa: 2 dl Hoi Sin sósa. Blandið 1 msk af sesamolíu saman við.

Takið öndina úr ofninum. Leyfið henni að jafna sig í um 10 mínútur og sneiðið þá niður. Skerið lærin frá. Skerið bringurnar frá skipinu og sneiðið niður. Setjið á fat eða beint á diska.

Berið fram með hrísgrjónum, sósunni og niðursneiddum vorlauknum.

Með öndinni er gott að bera fram ferskt Chardonnay frá Nýja heiminu, t.d. Montes Chardonnay.

 

Deila.