Hamborgarhryggurinn er vinsæll hjá mörgum og ómissandi á jólunum. Hamborgarhryggur er saltaður og reyktur svínahryggur og er þetta dönsk hefð sem hingað barst fyrir langa löngu. Danir borða hamburgerryg árið um kring og er þar ekki eins nátengdur jólunum og hér, jafnvel notaður sem álegg.
Hér eru mjög sterkar tilfinningar tengdar hamborgarhryggnum og flestir hafa fastmótaðar hugmyndir um hvernig beri að elda hann og útbúa gljáa og velja meðlæti.
Hryggurinn er yfirleitt soðinn og er gömul hefð fyrir því hér á landi að sjóða hann í rauðvíni. Hægt er að sjóða hann í vatni, blöndu af vatni eða hreinu rauðvíni. Í hreinskilni sagt þá breytir rauðvínið ekki miklu um bragðið á hryggnum en gefur hins vegar kraftmeira soð í sósuna. Hrygginn er best að setja í pott, leyfa suðunni að koma upp, sjóða í um 15-30 mínútur og síðan leyfa honum að kólna aðeins í soðinu.
Best er að fylgja leiðbeiningum framleiðanda varðandi eldun og suma hryggi hentar betur að elda í ofni.
Eftir að búið er að elda hrygginn er hann penslaður með gljáanum og settur í ofnskúffu og inn í 180 gráðu heitan ofn í um korter.
Hér áður fyrr var brauðmylsnu og púðursykri stráð yfir hrygginn áður en hann fór í ofninn en nú tíðkast mikil fjölbreytni í gljáanum.
Til dæmis er hægt að blanda saman í jöfnum hlutföllum:Dijonsinnepi, safanum úr dós af niðursoðnum ananas og fljótandi akasíu-hunangi. Einnig er vinsælt að nota púðursykur, tómatsósu og margt annað í gljáann. Í Danmörku er algengt að blanda saman sinnepi, púðursykri og raspi.
Það er líka hægt að útbúa gljáann á pönnu og hella yfir hrygginn.
Sósan er gerð með því að sjóða niður soð af hryggnum ásamt rauðvíni í hlutföllunum 2 af soði á móti einum af víni. Vilji menn mjög þykka sósu er gott að gera smjörbollu fyrst áður en soðið fer í sósupottinn. Þá er hægt að setja rjóma út í sósuna í lokinn.
Með hamborgarhrygg er klassískt að hafa sykurbrúnaðar kartöflur, heimalagað rauðkál, Waldorf-salat og annað sem hugurinn girnist.
