Ítalsk-amerískar kjötbollur

Ítalsk-amerísk eldhúsið þróaðist í Vesturheimi í samfélagi ítalskra innflytjenda er komu með matarhefðir sínar frá öllum svæðum Ítalíu. Þessar hefðir þróuðust áfram í Bandaríkjunum og tóku oft á sig nýja mynd. Stundum eru réttir ítalsk-ameríska eldhússins eins konar ýkt útgáfa af ítölsku frummyndinni enda allt aðeins stærra og meira vestanhafs. Vinsældir pizzunnar má til dæmis rekja til ítalsk-ameríska eldhússins og sömuleiðis hafa pastasósur á tómatagrunni notið ómældra vinsælda. Það er ekki að ósekju að stundum er talað um þessa matarhefð sem „red sauce kitchen“.

Þessi kjötbolluuppskrift er byggð á uppskrift, svolítiið stíl og staðfærð, frá lítilli sælkerabúð í Little Italy í New York, Di Palo Fine Foods, sem að sjálfsögðu selur heimatilbúnar kjötbollur.

Best er að nota hakkblöndu þar sem 1/2 er nautahakk, 1/3 grísahakk og 1/3 kálfahakk. Nautahakk og grísahakk má yfirleitt fá tilbúið en kálfakjötið verður maður að hakka sjálfur. Það má líka nota nautahakk og grísahakk til helminga.

  • 600 g hakk
  • 100 g ricotta
  • 1/2 dl rifinn parmesan
  • 1/2 dl rifinn pecorino
  • 2 pressaðir hvítlauksgeirar
  • 2 egg
  • 1 lúka fínt söxuð steinselja
  • 1 tsk þurrkað basil
  • 2 brauðsneiðar, skorpan skorin af og sneiðarnar saxaðar í mjög litla bita
  • salt og pipar

Blandið öllu vel saman og mótið kjötbollur á stærð við golfkúlur.

Tómatasósan

  • 2 dósir niðursoðnir tómatar eða 500 g tómatapassata
  • 3 hvítlauksgeirar, fínsaxaðir
  • 1 msk basil
  • salt og pipar

Byrjið á því að mýkja hvítlaukinn í 2-3 mínútur í olíu. Bætið þá tómötunum og kryddunum á pönnuna og látið malla á vægum hita í um 20 mínútur. Geymið.

Steikið kjötbollurnar í olíu á pönnu, brúnið vel á öllum hliðum í um tíu mínútum. Setjið þær síðan á pönnuna með tómatasósunni og látið malla í henni í 20-30 mínútur eða þar til að bollurnar eru fulleldaðar.

Berið fram með spaghetti. Sáldrið fínt saxaðri steinselju yfir. Hafið nýrifinn parmesan til hliðar. Einfalt og gott ítalskt rauðvín með, t.d. Chianti.

Deila.