Kartöflugratín í anda Miðjarðarhafsins

Þetta er hrikalega gott kartöflugratín þar sem að notuð eru hráefni sem eru algeng í eldhúsi Miðjarðarhafsins.

  • 800 g kartöflur
  • plómutómatar, niðursneiddir
  • 1 laukur, saxaður
  • 3-4 vænir hvítlauksgeirar, saxaðir
  • 8-10 sólþurrkaðir tómatar, saxaðir
  • 1 lúka söxuð basillauf
  • 1 dl hvítvín
  • væn lúka nýrifinn parmesan
  • ólífuolía
  • sjávarsalt og nýmulinn pipar

Flysjið kartöflurnar og skerið í þunnar sneiðar.

Hitið olíu á pönnu og mýkið laukinn í nokkrar mínútur, bætið þá hvítlauknum, sólþurrkuðum tómötum og kartöflunum út á og haldið áfram að steikja á miðlungshita í um fimm mínútur. (Hér er líka gott að setja klípu af chili-flögum út á). Hellið hvítvín út á og sjóðið nær alveg niður. Hrærið söxuðum basil saman við. Saltið og piprið.
Setjið kartöflurnar í eldfast form. Gott er að pensla það með ólífuolíu á undan. Raðið tómatasneiðunum ofan á og hellið smá ólífuolíu yfir. Eldið við 200 gráður í um klukkustund. Takið formið út og dreifið parmesanostinum yfir. Setjið aftur inn í ofn og eldið áfram í um 15 mínútur.

Deila.