Ég gerði þessa einföldu súkkulaðimús um daginn en þessi klassíski franski eftirréttur mousse au chocolat er alltaf jafn unaðslegur endir á máltíð. Það eru til margar útfærslur af súkkulaðimús. Stundum notar maður einungis eggjahvíturnar eins og í þessarri einföldu franskri súkkulaðimús eða bæði eggjahvítur og eggjarauður eins og í súkkulaðimús með rommi.
Í þessari uppskrift notum við bæði hvíturnar og rauðurnar og að sjálfsögðu gott, dökkt súkkulaði.
- 100 grömm dökkt súkkulaði (70%)
- 25 grömm smjör
- 2 eggjarauður
- 2 eggjahvítur
- 2 msk sykur
- 1,5 dl rjómi
Skerið súkkulaðið og smjörið í bita og bræðið yfir vatnsbaði. Takið af hitanum og hrærið eggjarauðurnar ei út í eina í einu.
Stífþeytið eggjahvíturnar ásamt sykrinum og blandið þeim varlega út í eggjahræruna. Það er best að gera það með sleif eða sleikju. Þeytið síðan rjómann og bætið honum við blönduna.
Setjið í glös (passar í cirka 4 glös) og kælið í ísskáp í nokkra klukkutíma.
