Satay-kjúklingur með hnetusósu

Satay eða Sate grillpinnar eru gífurlega vinsælir í Suðaustur-Asíur, ekki síst í Indónesíu, Singapore og Malasíu. Ég kynntist Satay fyrst í heimsókn til Singapore fyrir einum og hálfum áratug. Þar er hvað besta matinn að fá á svokölluðum „hawkers markets“ sem eru eins konar útimarkaðir þar sem hægt er að labba á milli bása og kaupa sér mismunandi rétti.

Einn sá þekktasti gekk undir heitinu Satay Club og var í Esplanade Park. Honum mun nú hafa verið lokað vegna nýbyggingar sem reist var á svæðinu en götumatsalarnir þar fluttu flestir yfir á Clarke Quay niðri við ána er rennur í gegnum borgina.

Þær eru fjölmargar útgáfurnar af Satay sem eru til en algengast er að nota kjúkling eða nautakjöt sem er látið liggja í kryddlegi um stund og síðan grillað á litlum spjótum og borið fram með hnetusósu.

Í þessari uppskrift er gert ráð fyrir kjúklingi en það má allt eins nota nautakjöt. Verði kjúklingur fyrir valinu eru beinlaus og skinnlaus læri besti kosturinn. Gerið ráð fyrir um 100-150 grömmum af kjöti á mann.

Í kryddlöginn þarf eftirfarandi:

  • 1 dl matarolíu, helst jarðhnetuolíu
  • 1 límónu (lime)
  • 5 hvítlauksgeira
  • 1/2 búnt vorlauk
  • 4-5 sm engiferbút
  • 1 tsk Túrmerík
  • 2 msk sojasósa
  • 1 msk taílensk chilisósa

Pressið safann úr límónunni, rífið hvítlauk og engifer á rifjárni, saxið vorlaukana smátt og blandið saman við olíuna, sojasósuna og chilisósuna. Bætið við Túrmerik, sem gefur hin einkennandi gula lit.

Skerið kjúklinginn niður í 2-3 sm bita og látið liggja í kryddleginum í 1-2 klukkustundir.

Þá er komið að því að gera hnetusósuna. Í hana þurfum við:

  • 2 msk jarðhnetu eða sesamolíu
  • 1/2 búnt vorlauk
  • 2 dl hnetusmjör (creamy frekar en crunchy)
  • 1 dl jarðhnetur, muldar
  • 2 dl kjúklingasoð
  • 1 tsk sykur
  • 1 msk sojasósa
  • 1/2 sítróna, pressuð

Hitið olíuna á pönnu, varist að hafa hana of heita. Steikið saxaða vorlaukinn í um 2 mínútur og bætið þá við hnetusmjörinu, kjúklingasoðinu, sykrinum, sojasósunni og safanum úr sítrónunniog jarðhnetunum.

Best er að hafa jarðhneturnar ósaltaðar en ef þið finnið einungis hefðbundnar salthnetur er ágætt að skola mesta saltið af þeim örsnöggt í vatni. Myljið þær síðan í matvinnsluvél eða með kökukeflinu.

Látið sósuna malla á mjög vægum hita í nokkrar mínútur eða þar til hún þykknar. Hrærið reglulega í henni. Athugið að þessi sósa verður nokkuð þykkari heldur en tilbúin Satay-sósa sem keypt er í dós.

Þræðið loks kjúklingabitana upp á grillteina og grillið. Berið fram jasmínhrísgrjónum og agúrkúbitum.

Þessi réttur hentar best með ungu og fersku hvítvíni, t.d. Montes Sauvignon Blanc eða Benchmark Chardonnay. Eða þá með asískum bjór líkt og Tiger-bjórnum sem veitingamennirnir í Satay Club buðu iðulega upp á.