Bodegas Franco-Espanolas mætti þýða sem frans-spænska vínhúsið og nafnið á sér sögulegar skýringar. Þegar að rótarlús lagði víngerð í Frakklandi í rúst á síðari hluta nítjándu aldar færðu margir eigendur vínhúsa í Bordeaux sig yfir til Rioja á Spáni á meðan að plágan gekk yfir. Þetta hafði mikil og mótandi áhrif á stíl vínanna á svæðinu og jafnvel urðu til ný vínhús, eins og Franco-Espanolas sem var stofnað af fjölskyldum frá Bordeaux og Rioja. Það er í dag með stærri og virtari vínhúsum svæðisins, vínin yfirleitt klassískt og tignarleg og njóta mikilla vinsælda á Spáni.
Gran Reserva-vínið frá Franco-Espanolas er frá árinu 2007, áratugar gamalt sem er ekki algengt að sjá í hillunum. Það eru hins vegar engin ellimerki á þessu víni hvað þá þreytumerki, það er líklega ansi nærri toppnum núna. Þroskin er aðeins að fara að segja til sín í litnum, sem er að færast yfir í múrsteinsrautt, í nefinu tóbakslauf og vindlakassi, smá dökkt súkkulaði og kryddaður ávöxtur, fínlegt og elegant með sléttum og fínum tannínum. Hörkuvín.
3.190 krónur. Frábær kaup.
-
9
