Hardy’s er með elstu vínhúsum Ástralíu og jafnframt það ástralska vínhús sem á sér hvað lengsta sögu á Íslandi. HRB stendur fyrir Heritage Reserve Bin en það eru mjög athyglisverð vín þar sem þrúgum frá mismunandi svæðum þessarar miklu heimsálfu er blandað saman. Í þessu Cabernet-vínu eru það þrúgur frá Margaret River og Frankland River í Vestur-Ástralíu og Coonawarra í Suður-Ástralíu, en öll eru þau með betri Cabernet-ræktunarsvæðum Ástralíu.
Vínið er mjög dökkt og djúpt á lit og enn mjög unglegt að yfirbragði, skrúfutappi tryggir ávallt ákveðinn ferskleika, í nefinu heitur og djúpur sólberjaávöxtur er rennur saman við myntu, kaffi og eikartóna. Mjög þétt og þykkt, mjúk en kröftug tannín, langt og ferskt. Hörkuvín.
3.999 krónur. Sérpöntun og vel þess virði að sérpanta. Með grilluðu rauðu kjöti og villibráð.
-
9
