Spænska héraðið Rioja er langþekktast fyrir rauðvínin sín en hvítvín héraðsins eru farinn að sjást í auknum mæli eins og spænsk hvítvín almennt. Þetta hvítvín frá Baron de Ley hefur löngum verið í miklu uppáhaldi hjá okkur enda er það ár eftir ár með bestu kaupunum í sínum verðflokki. Þrúgan sem fyrst og fremst er notuð er Viura, einnig þekkt undir nafninu Macabeo, en um tíundi hluti vínsins samanstendur einnig af Malvasia. Þrúgurnar eru ræktaðar í hæðum svæðisins Rioja Alta þar sem aðstæður gera þeim kleift að sameina jafnt ferskleika sem góðan ávöxt.
Litur vínsins er ljós, það er fölgult með grænum tónum og í nefinu eru sætar ferskjur, blóm og sætur sítrusávöxtur, það er ferskt og lifandi, fín sýra, ungt og sumarlegt.
1.899 krónur. Frábær kaup, ótrúlega gott vín fyrir þennan pening sem tryggir víninu einkunn í samræmi við það.
-
9
