Terlano er svæði í norður-ítalska héraðinu Alto-Adige. Það gengur einnig undir nafninu Suður-Týról og af sögulegum ástæðum er þýska mikið notuð en þetta Alpahérað deilir landamærum með Austurríki. Á þýsku heitir svæðið Terlan.
Þetta er eitthvert besta hvítvínssvæði Ítalíu og Cantina Terlan er dúndurframleiðandi.
Terlan Pinot Grigio Classico 2009 er ágætt mjög þurrt, þykkt og míneralískt með löngu bragði. Ávöxturinn einkennist af perum og vínberjum, vínið ferskt og þægilegt. Matvænt hvítvín sem mun endast, gott ungt en þolir alveg að bíða í 2-3 ár og taka á sig þroska.
2.495 krónur. Mjög góð kaup.
