Biscotti eru eftirlæti flestra Ítala. Þetta eru möndlutvíbökur sem heimildir eru til um allt frá miðöldum. Hróður þeirra hefur borist víða og heitið biscotti slæddist inn í fleiri tungumál og er fyrirmynd orðsins bisquit eða kexkaka bæði í frönsku og ensku. Biscotti eru yfirleitt bornar fram með kaffi og einnig er vinsælt á Ítalíu að bera þær fram með vin santo sætvíni sem bökunum er dýft ofan í.
- 150 grömm afhýddar möndlur
- 135 grömm sykur
- 2 stór egg
- 1 tsk vanilludropar
- 1 tsk matarsódi
- 1/4 tsk salt
- 245 grömm hveiti
- rifinn börkur af 1 sítrónu
HItið ofninn í 180 gráður. Ristið möndurnar í ofni i 8-10 mín eða þar til þær taka á sig gullinn lit. Saxið þær gróft og geymið.
Þeytið egg og sykur saman þar til að blandan er orðin þykk (um það bil 5 mín).
Bætið vanilludropunum og sítrónuberkinum saman við.
Sigtið og blandið hveiti, matarsóda og salti saman í aðra skál. Bætið síðan eggjablöndunni saman við og hrærið saman. Blandið loks möndlunum saman við. Ef deigið er mjög blautt má bæta smá hveiti við eftir þörfum.
Mótið deigið í lengju t.d. um 30 cm langa og 10 cm á breidd. Bakið í 25 mínutur.
Takið lengjuna úr ofninum og leyfið henni að kólna í um 10 mínútur.
Lækkið hitann á ofninum í 165 gráður.
Skerið lengjuna í um 2 sm þykkar sneiðar. Setjið á bökunarpappír á plötu og bakið áfram í um 10 mínútur á hvorri hlið eða þar til að kökurnar eru orðnar gullnar á lit. Það getur tekið nokkuð lengri tíma en 10 mínútur ef deigið hefur verið mjög rakt. Bakið áfram þar til að þær eru orðnar gullnar og stökkar.
