Trapiche er stærsta og eitt elsta vínhús Argentínu og hefur verið leiðandi á mörgum sviðum þau 130 ár sem það hefur starfað og að mörgu leyti dregið vagninn ásamt hinum risanum, Catena-Zapata, í að koma argentínskum vínum á kortið alþjóðlega á síðustu árum. Eins og gefur að skilja er Malbec-þrúgan áberandi í úrvalinu hjá Trapiche og Gran Medalla er eitt af toppvínunum, þrúgurnar koma frá einni ekru af svæðinu Uco, sunnarlega í Mendoza, sem er með bestu ræktunarsvæðunum. Ekran er í Los Arboles og er með þeim hæstu í Mendoza eða í um1.250 metrum yfir sjávarmáli.
Vínið er mjög dökkt og liturnn þéttur, í nefinu þykk, dökk berjaangan, bláber og krækiber, þarna er líka vottur af lakkrís og mildri eik. Í munni mjög slípað, elegant og í frábæru jafnvægi, mjúk, kröftug tannín, fersk og fín sýra, langt. Vín sem hefur gott af því að fá umhellingu svona klukkustund áður en það er borið fram.
3.699 krónur. Frábær kaup á þessu verði. Þetta er nautakjötsvín, fyrir góða Porterhouse og Ribeye.
-
10
