Franskir vísindamenn við háskólann í Reims hafa komist að þeirri niðurstöðu að best sé að beita sömu aðferð þegar menn hella kampavíni í glös og þegar bjórglös eru fyllt. Með því að halla glasinu sé tryggt að kolsýran haldist sem lengst í víninu.
Hin sígilda aðferð sem vínþjónar á betri veitingahúsum beita óspart er að láta glösin standa og hella beint ofan í þau. Þá gýs kampavínið upp og myndar töluverða froðu sem bíða þarf eftir að setjist.
Kampavínssérfræðingar segjast langt í frá sannfærðir um að þessi nýja rannsókn sýni fram á einhver endanleg sannindi. Vissulega haldist kolsýran betur í glasinu með því að halla því. Hin hefðbundna aðferð tryggi hins vegar að kolsýra geti gufað upp í stað þess að fylla vit neytandans er hann ber glasið að munni sér.
Sama rannsón sýndi einnig fram á að kolsýran – og þar með bólurnar sem einkenna freyðandi vín – gufi mun hraðar upp eftir því sem hitastig vínsins sé hærra. Best leiðin til að tryggja bólurrnar sé því að kæla vínið hressilega.
