Spaghetti Carbonara

Hér kemur enn ein sígild, ítölsk pastauppskrift. Sá ítalski veitingastaður er líklega vart til sem hefur ekki einhvern tímann verið með Spaghetti Carbonara í einhverri útfærslu á matseðli sínum. Þessi þykka pastasósa úr eggjum og osti ásamt beikoni er enda alveg hreint unaðsleg.

  • 500 g spaghetti
  • 250 grömm beikon (veljið það fituminnsta sem þið sjáið)
  • 2 eggjarauður
  • 2 egg
  • 1 dl hvítvín
  • Múskathneta, rifin
  • 2 msk ólívuolía
  • 2 msk smjör
  • 2 dl rifinn Parmesanostur

 Sjóðið spaghettí samkvæmt leiðbeiningum. Á meðan er sósan undirbúin.

Skerið beikon í litla bita og steikið í 2 msk af ólívuolíu í um fimm mínútur. Þá ætti beikonið að vera farið að verða stökkt. Bætið nú hvítvíninu við og leyfið því að sjóða saman við beikonið í 2-3 mínútur. Takið af hita og geymið.

Pískið saman eggjarauðurnar, eggin og parmesan-ostin í skál og bætið 1-2 tsk af rifinni múskathnetu ásamt nýmuldum pipar saman við. Geymið.

Þegar pastað er að verða tilbúið er beikonið hitað upp á ný og 2 msk af smjöri bætt út á pönnuna. Setjið pastað í sigti og bætið því síðan út á pönnuna. Blandið saman við beikonið. Slökkvið nú á hitanum og bætið loks eggjablöndunni saman við pastað. Hrærið henni varlega saman við og haldið síðan áfram að velta pastanu um á pönnunni þannig að eggjablandinn hitni vel. Það tekur nokkrar mínútur fyrir hana að verða tilbúna og það mikilvægasta er að kveikja ekki aftur á hitanum.

Berið fram ásamt rifnum parmesanosti, baguette-brauði og salati.

Ítalskt rauðvín með á borð við Villa Novare Ripasso eða Cantina Zaccagnini.