Tómatar eru mikið notaðir í matargerð og hér göngum við alla leið og setjum þá í aðalhlutverk. Þetta er afskaplega einfaldur og fljótlegur réttur en engu að síður mjög góður.
Fyrir fjóra þarf eftirfarandi:
- 8 tómata, ekki of litla
- 600 g nautahakk
- 1 lauk, saxaðan
- 4 hvítlauksgeira, fínt saxaða
- 1 dl rauðvín ef þið eigið það til
- 1 lítil dós tómatakraftur
- ferskar kryddjurtir, t.d. rósmarín, óregano og steinselju eða þurrkað rósmarín og óreganó og ferska steinselju
- Salt og pipar
Skerið ofan af tómötunum og haldið „lokinu“ til haga. Hreinsið innan úr tómatinum með skeið og saxið innvolsið.
Hitið olíu á pönnu og mýkið laukinn og hvítlaukinn. Bætið kjötinu út á og brúnið það í fimm mínútur eða svo. Saltið og piprið eftir smekk og bætið við kryddjurtunum. Setjið nú tómatakrafinn út á og hrærið saman við og svo saxaða tómatainnvolsið. Látið malla í nokkrar mínútur og hellið þá rauðvíninu út á. Sjóðið rauðvínið niður.
Setjið tómatana í ofnfast fat og fyllið þá með kjötinu. Setjið lokið ofan á. Ef eitthað kjöt er afgangs þá er gott að setja það í fatið með tómötunum.
Setjið inn í 200 gráða heitan ofn og eldið í 20-30 mínútur eða þar til tómatarnir eru orðnir alveg mjúkir og eldaðir í gegn.
Berið fram með fersku salati, hrísgrjónum eða pasta. Það er líka mjög gott að hafa smá nýrifinn parmesan til hliðar.
Einfalt en gott suður-ítalskt rauðvín með, t.d. A Mano eða Lamadoro.
