Samsetningin á kryddunum í þessari uppskrift er sótt til arabíska eldhússins en cummin og kardimomma gefa framandi og spennandi keim af kjúklingnum. Gert er ráð fyrir heilum kjúklingi.
Kryddlögur
- safi úr 1/2 sítrónu
- 1/2 dl ólívuolía
- 3-4 pressaðir hvítlauksgeirar
- 1 msk kardimomma
- 1 msk cummin
- 1 msk reykt paprika
- 1 msk mulin kóríanderfræ
- 1 tsk Maldon-salt
Blandið öllu saman í fati. Skerið kjúklingin í sundur á bringubeininu og fletjið í sundur. Nuddið kjúklingnum vel upp úr kryddblöndunni. Látið liggja í 1-2 klukkustundir.
Grillið með opnu hliðina niður fyrst, fyrst á beinum hita en síðan á óbeinum hita og undir loki. Snúið við eftir um 20 mínútur og eldið þar til að kjúklingurinn er fulleldaður, kannski 15 mínútur í viðbót. (Allt fer þetta eftir m.a. hitanum á grillinu og stærð kjúklingsins).
Jógúrtsósa
- 1 dós grísk jógúrt
- safi úr 1/2 sítrónu
- væn skvetta af ólívuolíu
- 2 pressaðir hvítlauksgeirar
- 1/2 lúka fínsaxaður kóríander
- 1/2 lúka fínsöxuð myntublöð
- 1 tsk Maldon salt
- 1 tsk cummin
Blandið öllu saman og geymið í kæli.
Þegar kjúklingurinn er tilbúinn er hann borinn fram ásamt basmati-hrísgrjónum, jógúrtsósunni og grænu salati. Til að hafa þetta alveg ekta mætti svo grilla pítabrauð með.
Með þessu hentar vel hvítvín á borð við Montes Alpha Chardonnay.
