Riesling er þrúga sem alla jafna nýtur sín best á svalari ræktunarsvæðum á borð við Rínardalinn og Mósel. Barossa-dalurinn í Suður-Ástralíu er hins vegar með heitustu ræktunarsvæðum gæðavína og þar nýtur Shiraz-þrúgan sín frábærlega. Peter Lehmann tekst hins vegar að rækta þar Riesling sem er brakandi ferskur og þéttur.
Peter Lehmann Classic Riesling 2010 er ljós á lit, fölgrænt, í nefi er fersk og sæt límóna áberandi og sítrónubörkur en einnig angan af blómum og Riesling-einkennin leyna sér ekki þótt stíllinn sé vissulega mjög frábrugðið þeim frá Rín. Það fer ekki á milli mála að hér er það Nýji heimurinn sem er á ferðinni. Vínið hefur mikinn þokka, bjartur ávöxtur, ferskt í munni og góð dýpt. Eitt og sér, t.d. sem fordrykkur eða með austurlenskum mat. Hvers vegna ekki sushi?
1.999 krónur. Mjög góð kaup.
