Hildigunnur bloggar – Banfi vínsmakk í Perlunni

Banfi vínkastalinn bauð íslensku vínáhugafólki upp á glæsilegt smakk í Perlunni miðvikudaginn 7. maí. Fullt af fólki þáði boðið og var vel troðið á hálfri veitingahússhæð Perlunnar.

Hér koma nokkrir punktar frá smakkinu:

BORÐ 1 – HVÍTT FRÁ MONTALCINO. – 2 vín

2012 Castello Banfi Fontanelle Toscana IGT 90 punktar
Ítalía, Toscana IGT

Virkilega flottur chardonnay frá Banfi. Ekki mikill ilmur en þægilegur. Sýruríkt, perur og sítrus í bragði. Mjög flott jafnvægi. Á 3k er þetta vín góður kostur miðað við t.d. Cloudy Bay á 4,5k.

2012 Castello Banfi Pinot Grigio San Angelo Toscana IGT 89 punktar
Ítalía, Toscana IGT

Afskaplega flott vín. Mjög gott jafnvægi og mikill ferskleiki. Nær kannski ekki alveg Fontanelle víninu á sama borði en engu að síður mjög gott vín.

BORÐ 2 – STRÖND TOSKANA HÉRAÐS. – 2 vín

2012 Castello Banfi La Pettegola Toscana IGT 86 punktar
Ítalía, Toscana IGT

Þessa þrúgu, Vermentino held ég að ég hafi aldrei smakkað áður. Ekkert yfir mig hrifin en samt allt í lagi vín. Miðað við hvítvínin á 1. borði þá var þetta ekki í sama klassa. Þetta reyndar ferskt en vantaði bæði upp á ilm og bragð til að ná sama klassa.

2012 Castello Banfi Bolgheri Aska
Ítalía, Toscana, Bolgheri

Hef ekki smakkað þetta vín áður. Mér er tjáð að það sé vinsælt í vínbúðum. Á 3,6k þá finnst mér það í hærri kantinum þar sem ég veit um nokkur vín á um 2k sem gætu alveg staðist því snúning. Vínið er samt ungt og gæti átt eftir að þroskast og batna því það virkaði frekar hrátt. Eins og staðan er í dag er það um 87. Gæti tekið framförum.

BORÐ 3 – CHIANTI CLASSICO. – 2 vín

2012 Castello Banfi Chianti Classico Fonte alla Selva 85 punktar
Ítalía, Toscana, Chianti, Chianti Classico DOCG

Þá var komið að Chianti vínum. Þessi Chianti Classico var alltof ungur. Mjög hrár og tannín hörð. Litur ljós. Lagast vonandi við geymslu. Slakasta vínið í smakkinu.

2010 Castello Banfi Chianti Classico Superiore 89 punktar
Ítalía, Toscana, Chianti, Chianti Classico DOCG

Þetta var allt annað vín en CC vínið á undan. Ljós litur. Mjög gott jafnvægi. Skógarbotn og sæta í nefi. Kirsuber aðallega í munni. Þægileg sýra og gott jafnvægi. Á líklega eftir að taka framförum næstu 4-5 árin.

BORÐ 4 – BLAND Í POKA (IGT) FRÁ MONTALCINO. – 4 vín

2012 Castello Banfi Centine Toscana IGT 86 punktar
Ítalía, Toscana IGT

Er ekki alveg viss um þetta vín. Frekar hrátt en býr samt yfir ákveðnum sjarma. Verðmiðinn er ekki fráhrindandi eða 2,2k. Gæti alveg átt framtíð fyrir sér. Líklega betra með mat en án því það er sýruríkt.

2011 Castello Banfi Cum Laude 90 punktar
Ítalía, Toscana

Nú var komið að stóru vínunum. Cum Laude er virkilega flott vín. Glæsilegur, klassískur og flottur ilmur. Kirsuber og dökkir ávextir ríkjandi. Í munni kirsuber. Flott sýra og jafnvægi. Góð kaup á 3,6k í Vínbúðum.

2010 Castello Banfi Summus 92 punktar
Ítalía, Toscana, Montalcino, Sant’ Antimo

Mjög flottur ilmur, dökkir ávextir, vanilla og blómaangan. Flauelsmúkt og í flottu jafnvægi. Kirsuber og vanilla, jafnvel smá kaffikeimur. Glæsilegt vín.

2010 Castello Banfi Excelsus 91 punktar
Ítalía, Toscana, Montalcino, Sant’ Antimo

Mér fannst Summus vínið aðeins betra. Hér voru aðeins hrjúfir kantar á víninu. Einnig fannst mér það vera aðeins of mikið, líklega merlot-ið. Engu að síður gott vín í góðu jafnvægi.

BORÐ 5 – SANGIOVESE FRÁ MONTALCINO. – 2 vín

2012 Castello Banfi Rosso di Montalcino 86 punktar
Ítalía, Toscana, Montalcino, Rosso di Montalcino

Liturinn á þessu víni var ótrúlega ljós, pinot noir líkur. Ekki mikill ilmur en einna helst rauð ber. Í munni kirsuber. Þetta vín heillaði mig ekkert sérstaklega. Það er þó ungt og gæti átt eftir að þroskast. Líklega betra með mat heldur en eitt og sér, því sýran er til staðar.

2009 Castello Banfi Brunello di Montalcino 91 punktar
Ítalía, Toscana, Montalcino, Brunello di Montalcino

Þá var komið að Brunello. Þetta er náttúrlega mjög ungt vín, ekki nema 5 ára gamalt. Liturinn á því var mjög ljós, samt ekki eins ljós og á Rosso di M. á sama borði. Talsvert flóknara og betra vín líka. Í ilmi jarðartónar, rauðir ávextir, vanilla. Mikil kirsuber í bragði. Mesta furða hvað það var mjúkt miðað við aldur. Gott jafnvægi. Gæti orðið mjög flottur Brunello eftir 5-10 ár.

BORÐ 6 – FLOTTARI BRUNELLOAR. – 2 vín

2009 Castello Banfi Brunello di Montalcino Poggio alle Mura 93 punktar
Ítalía, Toscana, Montalcino, Brunello di Montalcino

Mun dekkra á litinn heldur en vínin á næsta borði á undan. Verulega flottur ilmur. Vanilla, jarðartónar, kaffi, kirsuber, plómur í nefi. Í munni talsverð sýra, mjög gott jafnvægi. Kirsuber, kaffi, vanilla. Virkilega flott vín. Væri gaman að sjá verðmiðann á þessu.

2007 Castello Banfi Brunello di Montalcino Riserva Poggio All’Oro 93 punktar
Ítalía, Toscana, Montalcino, Brunello di Montalcino

Svipað á litinn og alle Mura. Mjög flottur ilmur. Mikil vanilla, jarðartónar, kaffi, lítill ávöxtur. Í munni talsverð sýra, mjög gott jafnvægi. Vanilla, smá súkkulaði, kaffi. Glæsilegt vín. Mér fannst samt eikin aðeins yfirdrifin. Samkvæmt upplýsingablaðinu á borðinu þá hefur vínið legið í eikartunnu í a.m.k. 2 ár. Það er hellingur. Væri samt áhugavert að smakka þetta eftir 5-10 ár. Af þessum tveimur myndi ég heldur velja alle Mura.

BORÐ 7 – SÆTT FRÁ MONTALCINO. – 1 vín

2011 Castello Banfi Moscadello di Montalcino Florus 89 punktar
Ítalía, Toscana, Montalcino, Moscadello di Montalcino

Nú var skipt um gír og farið yfir í sætvín, enda erfitt að slá út rauðvínin á borði 6. Þetta sætvín var alveg ágætt. Passleg sýra til að vega upp á móti sætunni. Í ilmi apríkósur og stikilsber. Passaði vel með kransakökukossum sem var boðið upp á í lok smakksins. Á þessu borði var líka boðið upp á grappa. Mér fannst það hræðilegt. Hellti því eftir tvo sopa. Eini vökvinn sem fór þá leið á smakkinu hjá mér.

BORÐ 8 – SAMTÍNINGUR Í LOKIN. – 2 vín

2011 Vigne Regali (Banfi) La Lus 88 punktar
Ítalía, Piedmonte

Þetta var 8. og síðasta borð. Á þessu borði var bland í poka, eitt rauðvín (la Lus) og tvö freyðivín. Held að la Lus hafi örugglega verið 2011. Það var mjög ávaxtaríkt en ekkert sérstaklega spennandi að mínu mati. Man ekki eftir að hafa smakkað þessa þrúgu (albarossa) áður.

2011 Castello Banfi Brachetto d’Acqui 89 punktar
Ítalía, Piedmonte, Brachetto d’Acqui DOCG

Þetta rauða freyðivín var mjög skemmtilegt. Ávaxtaríkt, aðeins sætt en nægileg sýra til að það var langt frá því að vera væmið. Ég tók ekki eftir árganginum á þessu víni, hélt að það væri NV. Líklega hefur það samt verið 2011. Væri alveg til í að kaupa eitthvað af þessu. Á sama borði var svo í boði Asti moscato freyðivín sem var of sætt fyrir minn smekk. Samt langt frá því að vera eins dísætt og mörg Asti freyðivín.

Þetta var sérstaklega glæsilegt smakk hjá Bakkusi og Banfi vínhúsinu. Það sem mér fannst standa upp úr voru náttúrlega Brunello vínin á borði 6 og Summus vínið. Síðan var Chardonnay vínið á 1. borði einstaklega gott. Gæti auðveldlega dottið inn á listann hjá okkur. Rauða freyðivínið á síðasta borði kom svo skemmtilega á óvart.

Deila.