Öndin er vinsæl á jólaborðum Breta þótt líklega sé kalkúnin algengasti rétturinn þar. Yfirleitt er öndin fyllt og fyllingin er oftast aðeins frábrugðin þeirri dönsku sem að við höfum helst tekið upp á okkar arma. Heslihneturnar setja svip á þessa fyllingu ásamt sítrusávöxtunum sem gefa yndislegt bragð þótt við notum einungis börkinn og safann. Sellerí gefur síðan smá festu undir tönn og eplin sætu.
Þessi uppskrift að fyllingu passar í eina 3,5 kílóa Barbary-önd sem er nægur matur fyrir fjóra í það minnsta ásamt meðlæti.
Fyllingin:
- 3-4 brauðsneiðar, saxaðar smátt
- 100 g muldar og risaðar heslihnetur
- 1 laukur, fínsaxaður
- 2-3 sellerístönglar, skornir smátt
- 1 egg, pískað
- 2 græn epli, kjarnhreinsuð, flysjuð og skorin í bita
- safi og rifinn börkur af einni appelsínu
- safi og rifinn börkur af einni sítrónu
- 1 msk ferskt timjan
- 1 tsk rifinn múskat
- salt og pipar
Dreifið muldum heslihnetum á ofnplöttu og ristið í 200 gráðu heitum ofni í um fimm mínútur eða þar til að þær eru farnar að ilma vel og aðeins að dökkna. Passið vel upp á tímann.
Rífið börkinn af sítrónu og appelsínu á fínu rifjárni. Pressið safann.
Saxið lauk, sellerí og epli. Pískið egg, skerið brauðið niður og rífið múskat.
Blandið öllu saman í skál.
Skolið öndina. Að innan og utan. Skerið rákir í skinnið og nuddið upp úr sjávarsalti. Setjið fyllinguna inn í.
Setjið á grind í ofni og látið bringurnar snúa upp.Setjið ofnskúffu undir til að láta safann úr öndinni leka ofan í. Í ofnskúffunni hafði þið 1 grófsaxaðan lauk, 2-3 grófasaxaðar gulrætur og 1 sellerístöngul ásamt 2-3 dl af vatni.
Eldið í um 1 klukkustund við 200 gráður. Snúið þá við í hálftíma og eldið síðan áfram með bringurnar upp þar til að skinnið er orðið gullið og stökkt.
Takið öndina út og látið standa í 10-15 mínútur áður en hún er borin fram.
Sósan:
Þegar öndin er búin að vera um klukkustund í ofninum er 2-3 dl af hvítvíni bætt út í ofnskúffuna og látið malla með í um hálftíma.Takið þá skúffuna úr og síið soðið í pott. Það getur verið skynsamlegt að taka grindina með öndinni út fyrst og leggja til hliðar til að vökvinn úr öndinni leki ekki niður í ofnin á meðan.
Fleytið mestu fitunni af soðinu. Sjóðið niður á miðlungshita þar til að þið eruð komin með bragðmikla sósu.. Undir lokin er 2-3 msk af rifsberjahlaupi (eða appelsínumarmelaði) hrært saman við. Þá er gott að piska um 1 dl af rjóma saman við alveg í lokin. Bragðið tl með salti og pipar.
Með öndinni er gott að bera fram sykurbaunir sem eru forsoðnar og síðan steiktar úr andarfitu og Duchesses-kartöflur.
Hér eru Bordeaux-vín í essinu sínu, t.d. Brio de Cantenac.
